Juventus បានត្រៀម និងផ្តល់នៅសំណើរ ពិសេសមួយសម្រាប់ដេញថ្លៃយកកីឡាករឆ្នើម Mohamed Salah របស់ហង្សក្រហម Liverpool នៅរដូវក្តៅខាងមុខដែលមានតម្លៃ ៥០លានអឺរ៉ូ (៤៤ លានផោន) បូករួមជាមួយខ្សែប្រយុទ្ធអាហ្សង់ទីន Paulo Dybala ម្នាក់ទៀត ដើម្បីអោយក្រុមម្ចាស់ជើងឯករង Champion League ពិចារណា។ គោលបំណងរបស់ក្រុមម្ចាស់ជើងឯក SerieA ចង់បាន Salah ដើម្បីចាប់ដៃគូជាមួយ Christiano Ronaldo ខណៈខ្សែប្រយុទ្ធនិយមប្រើជើងឆ្វេង Paulo Dybala រកគ្រាប់បាល់បានតែ ៨គ្រាប់ក្នុងការបង្ហាញខ្លួន ៣៣ប្រកួតចុងក្រោយប៉ុណ្ណោះ។
យោងតាមទស្សនាវដ្តី Tuttosport របស់ប្រទេសអ៊ីតាលីបានចុះផ្សាយ លើទំព័រមុខរបស់ពួកគេនៅថ្ងៃព្រហស្បតិ៍នេះ ខណៈម្ចាស់ជើងឯក SerieA អ៊ីតាលីនៅតែបង្ហាញពីចេតនាច្បាសលាស់ក្នុងការចុះហត្ថលេខាលើតារាបាល់ទាត់ក្រុមជម្រើសជាតិអេហ្ស៊ីបរូបនេះ។ Salah ទើបតែបានចុះហត្ថលេខាលើកិច្ចសន្យារយៈពេល ៥ឆ្នាំថ្មីមួយក្លឹប Liverpool កាលពីខែកក្កដា ២០១៨ ហើយលក្ខខណ្ឌមិនបានរាប់បញ្ចូលនៅតម្លៃទិញផ្តាច់កុងត្រានោះឡើយ។
កីឡាករវ័យ ២៦ឆ្នាំរូបនេះបានស៊ុតបញ្ចូលទីឥតឈប់ឈរចាប់តាំងពីការចូលរួមជាមួយក្រុម Liverpool ពីក្លិប Roma នៅឆ្នាំ ២០១៧។ គាត់បានស៊ុតបញ្ចូលទី ៤៤គ្រាប់នៅក្នុងរដូវកាលដំបូងខណៈ Liverpool បានឈានដល់វគ្គផ្តាច់ព្រ័ត្រនៃក្របខ័ណ្ឌ Champions League និងបរាជ័យក្រោមថ្វីជើង Real Madrid។
Salah បច្ចុប្បន្នជាអ្នកស៊ុតបាល់បញ្ចូលទីនាំមុខគេក្នុងក្របខ័ណ្ឌ Premier League ដោយមាន ១៧គ្រាប់ស្មើជាមួយ Kun Aguero របស់ Man.City ស្របពេល Liverpool ឈរនៅលេខរៀងទី២ បន្ទាប់ពី Manchester City ដោយសារពិន្ទុស្មើគ្នា ប៉ុន្តែចាញ់ក្នុងការរកគ្រាប់បាល់បញ្ចូលទីស្របពេល Liverpool មាន១ប្រកួតក្នុងដៃ។
កែសម្រួលដោយ៖ Cambosport
ប្រភព៖ dailymail