Bayern Munich បានខកពេលលើកពានលីគកំពូលអាល្លឺម៉ង់ Bundesliga ចុងសប្ដាហ៍កន្លងទៅ បន្ទាប់ពីបានត្រឹមស្មើ ០-០ នៅទឹកដីរបស់ Leipzig។ ខ្សែបំរើអាល្លឺម៉ង់ Leon Goretzka ស៊ុតបញ្ចូលទីឲ្យ Bayern Munich នៅវគ្គទី២ តែត្រូវបានលុបចោលវិញដោយ VAR។
Bayern Munich មានឱកាសជាច្រើនទៀត ដូចជាឱកាសរបស់អតីតខ្សែបំរើ Arsenal, Serge Gnabry ជាដើម។ ប្រសិន Bayern Munich ឈ្នះការប្រកួតនេះមានន័យថា ពួកគេនឹងលើកពាន Bundesliga ៧រដូវកាលជាប់គ្នា តែបានត្រឹម ០-០ ស្របពេលដែលក្រុមលេខពីរ Borussia Dortmund យកឈ្នះ Dusseldorf ៣-២។
Dortmund ត្រូវការឈ្នះដាច់ខាតដើម្បីអ៊ុតពាន Bundesliga នៅសប្ដាហ៍ចុងក្រោយ ខណៈកីឡាករអាមេរិក Christian Pulisic បើកការនាំមុខឲ្យ Dortmund តែភ្លាមៗត្រូវបាន Dusseldorf តាមស្មើវិញដោយ Oliver Flink។ យ៉ាងណាក្តី Dortmund រកបាន ២គ្រាប់ទៀតដោយ Thomas Daleney និង Mario Goetze បានធ្វើឲ្យពួកគេធូរស្រាល មុនពេលដែល Dusseldorf តាមបាន 1គ្រាប់វិញនៅចុងម៉ោងដោយ Dawid Kownacki។
ចប់ការប្រកួត Dortmund យកឈ្នះ Dusseldorf ៣-២។ លទ្ធផលបែបនេះមានន័យថា Dortmund តាមពីក្រោយ Bayern Munich ២ពិន្ទុប៉ុណ្ណោះ។ សប្ដាហ៍ចុងក្រោយនៃក្របខណ្ឌ Bundesliga, Dortmund ធ្វើដំណើរទៅផ្ទះ Borussia Moenchengladbach ខណៈ Bayern Munich ទទួល Frankfurt៕
Bayern Munich ខកពេលលើកពាន Bundesliga ក្រោយស្មើនៅផ្ទះ Leipzig ខណៈ Dortmund យកឈ្នះ Dusseldorf
អត្ថបទទាក់ទង